Alla Itolae Nusa 21
Eleki TUHANE Iriluke misete ete Sara lulu Italuke misete eteije.
Hoko Sara ikeu blublulu eleki iruele kwete mokwai ete Abrahame kena intua peneka, lulu petu rebe Allah Ibetekele etei pende.
Abrahame iono kwetele rebe Sara iruelei etei mere eni nane Isake.
Eleki kena kwetele mere eni petua kwalure, Abrahame isunateni lulu Alla Ipletaeni lokole.
Kena Sara iruele Isake ete Abrahame, Abrahame eni musuna utune esa.
Eleki Sara ibeteke be, “Alla iono au mali, hoko pusue tamata rebe esi lene saisa rebe eono meije esi mali lekwe le laleisu ndina.”
Kai ibeteke be, “Sae ihlaleke kena au susu kwetele moneka, po meije au ruele kwete mokwai ete Abrahame kena intua peneka.”
Kwetele mere itapa ela, kai kena teu susu beine, Abrahame iono pesta elake.
Kena petu sae, Sara iselu Hagare, bina Mesire mere eni nanae rebe iruelei ete Abrahame, iklema kai Isake, Sara eni nanare.
Eleki Sara ibeteke loko Abrahame be, “Asui bina makerike eteku mere kai eni nanare le bina mere eni nanare ikbasae amu taneiaru sakesa kai auku anae Isake mo.”
Po Abrahame isusa le Ismaele lekwe eni nanare neka.
Eleki Alla Ibeteke loko Abrahame be, “Kaplalemu le Ismaele kai amu tamata makerike mere yake. Lene loko Sara eni lepate le bei Isake pine Au ono anubua boka etemu lulu Au taluke ete ale.
Po anubua bei amu tamata makerike mere eni nanare, Au onosi boka lekwe eti esi ono nusa toini, le ile amu anae lekwe.”
Eleki ele bobanu bebeleite Abrahame iriluke manane kai kwele kena kantone usai ete Hagare. Itolae eni nanae Ismaele kena Hagare malaije eleki iulake luasi keu ne. Luasi keu hoko sirike luasi me otoi nsekile sae me otoi Berseba.
Kena kwele me kantone usaije pusue, eleki Hagare itolae eni nanae mere kena melate,
eleki Hagare irue kasuke metera utune bei kwetele mere. Le itahane rame mo kena limese eni nanare imatare. Kena irue mere irani ela titinai.
Eleki Alla Ilene kwetele mere naije, eleki Alla Eni malekate lepa bei ndete lanite loko Hagare be, “Hagare, asusa saisa? Rilamu yake le Au lene kwetele mere naije bei otoi rebe intulu kenare peneka.
Akeu lokoi kai bitikeni, le Au ono eni anubuaru esi ono nusa toini elake.”
Eleki Alla Iono Hagare iselu prigi sae me, eleki ikeu kute kwele kena kantone usai mere, iinuke kwetele mere.
Alla Iraka kwetele mere eti iela, irue me otoi nsekile kai iono tamata maka aklali misete.
Hoko irue me otoi nsekeli Parane. Kai inai irana bina bei mpai nusa Mesire etei kena eni bina.
Kena mere kamale Abimeleke kai eni solaluaru esi elake, eni nane Pikole luasi luake loko Abrahame kai esi beteke be, “Alla Itapamu kena sasaisa neka rebe aonore.
Bei mere hoko ala loko Alla ete meije be aono susate ete au pise auku anaru kai auku anubuaru mo, lupe au ono ebe kai ale meije. Aono misete ete au kai ete pusue tamata mei tapele rebe arue kenae lupe tamata maka luake beluke meije.”
Eleki Abrahame ibeteke be, “Yele, au la.”
Po lomei Abrahame imuruke Abimeleke moneka le eni tamata makerikaru esi rare le Abrahame eni prigire.
Eleki Abimeleke ibeteke loko Abrahame be, “Sire iono ele mere au rekwai mo, le abeteke ete au mosa, kai meije pine auku lenele meije.”
Eleki Abrahame iriluke dombaya kai sapea ete Abimeleke, eleki luasi taluke misete kai lomai.
Eleki Abrahame ililake domba anai rebe inaije, anai itu bei eni dombaru.
Eleki Abimeleke ibeteke lokoi be, “Le mula pine aono ele mere?”
Eleki Abrahame ibeteke be, “Au riluke domba anai itu meije ete ale, leke eono tanda kena anaku be prigi meije au kalie.”
Hoko otoi mere esi nane Berseba, le me otoi mere pine luasi la ete lomai.
Eleki kena luasi la ete lomai pela peneka, Abimeleke kai Pikole luasi leu Pilistinaru esi nusare ne.
Eleki Abrahame iatnane ai tamariska aini me Berseba, kai bei petu mere otoi mere iono kena otoi maka tatu loko TUHANE, Alla rebe Ikbasa eti pela.
Abrahame irue takwali me tamata Pilistine esi tapele.